“Ua tusia, ‘E LE NA O MEA’AI E OLA AI LE TAGATA, A O AFIOGA UMA LAVA E PA’U MAI I LE FOFOGA O LE ATUA.'” Mataio: 4:4
O upu nei a lo tatou Ali’i o Iesu Keriso na ia fetalai mai ai lava. O afioga fo’i nei o lo’o o’u taumafai ina ia avea ma ni mea’ai moni aua le fafagaina o agaga a o tatou tagata. Tatou te ola mai, tatou maua le malosi, tatou fa’asolo ina matutua ma tatou fa’asolo atu fo’i i le oti po’o le i’uga o lo tatou olaga. E tofu i tatou ma le ola ua uma ona fa’atulagaina mai fo’i aso o lo tatou ola. Ae o totonu o lenei taimi fa’atulagaina, ua tu’uina mai ai fo’i ia i tatou le responsibility e ao ai ina ia fafagaina o tatou agaga ina ia ola ma iloa le Na Faia i tatou, o Ia o lo tatou Atua, ma o lo’o fa’atali mai o ia i lo tatou toe fo’i atu ma ia tatou tu’uina atu se tala po’o se fa’amaumauga o lo tatou olaga pe na fa’afefea ona fai.
O lea la o lo’u tiute tau’ave o le Tamā Fa’aleagaga o Malaeola o le ta’ita’i ma ia ou fafaga i agaga o o tatou tagata. O le tofia ai o a’u e le Epikopo e avea ma Tamā Fa’aleagaga i Malaeola nei, o se tiute ou te le tu’umāmāina ma o se galuega e le faigofie fo’i. O lea ou te fa’afetai ai ia te outou uma mo le fesoasoani mai ia te a’u i taimi e mana’omia ai.
Ou te fa’afetaia fo’i si o’u tuafafine i le tofi – Taupou Sā ia Sr Pelenatete (SMSM) mo lana fesoasoani a o ma galulue ai i le 2014 a o le i si’itia o ia e galue i Samoa.
Ou te avea fo’i lenei avanoa tāua, ou te fa’afetaia ai ou uso a Faifeau o e na galulue punonoua’i i totonu o Malaeola nei i le tauasuina lava o le Ipu o le Ola i tausaga ua tuana’i. Fa’afetai tele lava mo galuega uma na outou fa’atinoina mo le tautuaina o le Atua ma lona finagalo e ala i o tatou tagata.
O lenei itulau ua fa’apitoa lava lea mo Sauniga Lotu ua uma ona fa’atinoina ma pu’eina fa’apea fo’i ni semina ma ni nisi fo’i o alaga’oa. Ua ou tu’uina atu le fa’atanaga fa’apitoa ina ia mafai ai ona e fa’aaogaina. E le o ni galuega ina ia mitamita ai se tasi, ae talitonu ma le agaga maualalo o le a fa’apea ona ola ai fo’i lou agaga ma fa’afo’i ai pea le vi’iga o le Atua ona ua ia faia mea silisili mo i tatou.
Ia i le Atua pea lona vi’iga
O la outou auauna i lona alofa
Patele Mikaele Alipia Endemann
Talu ai ona o le galuega e tele mea e fa’atinoina, ua ou tofia ai le Afioga ia Tufa’asisina e na te ta’ita’ia le aufaigaluega e gafa ma le tapenaina o Misasa, fa’apea aso fa’amanatu o le lotu pe a o’o ina fa’amanatuina. Ou te fa’afetaia ai i lenei tina ma le aufaigaluega ia ae fa’apea fo’i i latou uma o lo’o fesoasoani i le tapenaina o a tatou faigalotu ma fa’amanatuga.
Tuifaasisina Sia Maiava-Setefano
Malaeola Samoan Catholic Community
LITURGY CO-ORDINATOR
(Ta’ita’i ole Komiti o Sauniga-Lotu