O le Ekalesia Katoliko Samoa i Glen Eden na faavaeina i le tausaga e 1978 e ni si o aiga Samoa sa latou ulua’i nofoia lenei pitonuu ma auai i galuega fai i totonu o le palisi – Our Lady of Lourdes. Sa faauluina i le faalapotpotoga a Ekalesia Katoliko Samoa Tuufaatasi o Aukilani i le tausaga lava lea faatasi ai ma la latou Aoga Aso Sa ma le mafutaga Autalavoau. I le taimi nei ua leai se mafutaga Autalvaou ona ua to’aititi le tupulaga talavou ua faasino tonu i ai le agaga faa-le-autalavou. O loo faaauauina pea le ‘au’aunaga i totonu o le aoga Aso Sa. Ua faavaeina foi le Mafutaga a Tina i totonu o le ekalesia.
O lo matou suluga ua filifilia ai Sagata Pelenatete i le aso 11 o le masina o Fepuari i tausaga taitasi.
I le taimi nei e 16 matafale o loo auauna i totonu o le ekalesia Samoa i totonu lava o le palisi- Our Lady of Lourdes, faapea le Ekalesia Samoa Tuufaatasi i Malaeola. O la matou aufaipese o loo faatautaia lea e le afioga a Sala N. Tunai, ma le tofa a Tunai Michael. E peseina e la matou aufaipese Samoa le Misasa o le Aso Sa lona fa (4) o masina taitasi; ona sosoo ai lea ma la matou fonotaga faa-le -masina i le mae’a ai o le Misasa. Tele foi ni si auaunaga o loo galulue ai ni si o le ekalesia Samoa i totonu lava o le palisi.
- Pacific Wardens
Ua faatuina i totonu o la matou ekalesia le Pacific Wardens – Glen Eden. E galuea’ina ma faatinoina lenei auaunaga e matafale o le ekalesia Samoa faatasi ai ma le lagolagoina e alii pelepitelo a le palisi (parish priests) faapea le Parish Council. O le manatu autu o lenei auaunaga; e mo le puipuia lea o le soifua saogalemu o tagata uma o loo alaala i totonu o le pitonuu aemaise ai le taulaga faatau i totonu lava o Glen Eden. E mafai foi ona oo atu la matou auaunaga i fafo atu o le pitonuu o Glen Eden i taimi e mana’omia ai.
- Fit for Mission
I lalo o le polokalame, ‘Fit for Mission’ o loo fuafuaina se polokalme e fesoasoani atu ai i tupulaga mo le itu tau a’oa’oga (Study Centre) i totonu lava o le palisi. Ua mae’a ona ulua’i soalaupule ma faatalanoaina le mataupu ma se tasi o tama’ita’i o loo galue nei i le Univesite o Aukilani (The Catholic Institute of Aotearoa) ma o le ‘a tulimata’i pea lenei faamoemoe mo se taimi o i luma.
I lalo lava o le polokalame -‘Fit for Mission’ ua faavaeina ai i le Our Lady of Lourdes se poloketi (project) ua faaigoiana o le WESTY. O loo ta’ita’iina e ni si o le ekalesia Samoa ni si vaega eseese o lenei polokalame e i ai le – Worship-Education-Service-Temporalities-Youth.
Manuia le faamanatuina o le 20 tausaga o le auaunaga a Malaeola Centre.
Luafalealo Felise – Peresetene