Ole Talaaga ma le amataina o le Ekalesia Samoa o Ponsonby i totonu lava o le Palisi o Ponsonby ae maise o le uluai Ekalesia Samoa i Aukilani Aotearoa, e pei ona i ai nei le 25 Ekalesia a le Malaeola Katoliko Roma.
O le’a epa ia i fata ma taoto i tafa tafai lagi le paia o Samoa mai a i le tai Samasama o le Tuimanua se ia paia le fafao Sauali’i, O paia ua uma ona Lalago ma fa’atutee ma poupou i le toa. E faigata Samoa o le fue lavelave ma le Vaofilifili Taoto, ia e fa’apea foi paia o le Ekalesia Katoliko Roma i tulimanu e 4 o le lalolagi. Ae fa’apito augafa i le Ekalesia Katoliko Samoa i Malaeola, i Aukilani NZ.
Sa le toatele nisi sa autova’a mai ina vaitau. Na’o nai afakasi (halfcaste) ma alo fo’i o fa’afeagaiga ma i latou e lelei le tamaoaiga i Samoa i lena vaitau sa muamua ona autova’a mai. Sa le to’a tele ni Samoa, ma seasea fo’i ona feiloai ai se’i vagana o kalapu faafiafia e pei o le Moli (orange) Gluepot i Ponsonby ma le Castle Bar i Symond St, ona fa’atoa feiloa’i lea ma ni tagata Samoa. O nei feiloaiga na amataina ai loa se fa’alapotopoto ga e ta’ua o le Malisi Club (Marist Club). Alu ai lea mafutaga ua amata ona feololo mai nai Samoa ae maise le au lotu Katoliko. Ona liliu ai lea o le tofa ma saili le moe ma autasi o le’a savalia le tama Epikopo ma faifeau (Priests) ina vaitau ua finagalo autasi le Malisi Club e fia fa’atuina se Ekalesia Samoa (Katoliko) Sa talia fiafia lea savali e lana Afioga. O le taimi fo’i lea o i ai le falesa i Pitt St, City. Ao le Hall a St Benedict i Symond St, sa fai fonotaga. Sa fa’aogaina foi le falesa o St Benedict e le mafutaga lea mulimuli ane ina ua suia ese Pitt St, i le tausaga lea 1952 pe muamua atu na fa’avae ina lea Ekalesia e tagata Samoa muamua.
O le tausaga 1953 na Malaga mai ai Leilua Mika Vitale i Niu Sila ma ia mafuta loa i ai i lea mafutaga ua ta’ua o le Ekalesia Katoliko Samoa. Se ia o’o i le tausaga 1955, ua amata ona to’a tele mai nai tagata Samoa, aemaise o Ponsonby ma Grey Lynn pei o pitonu’u nei sa sili ona to’atele ai tagata Polenisia. Ona a’e lea o le tofa i tamali’i ma failauga i lena vaitau o le’a fa’atu maoti loa le Ekalesia a Ponsonby i lalo o le taitaiga a le afioga a Leilua Mika Vitale, fa’apea fo’i isi tamali’i ua fai i lagi le folauga (Pesa Fidow, Iuli Sefo, Alofi Pereira) ma isi lava tamalii ma i latou sa fa’atau fale motu ma nonofo lava i nei i Ponsonby.
O tupu ma tamalii ma Fale Upolu totofi na mulimuli ane ai O e sa ifogafa ma tautua i le Ekalesia. E pei o le susuga ia Ugapo ma Tuala Fulu Aukusitino fa’ave Otahuhu, O Patu Sanele Alofa fa’ave Tamaki lea ua sui nei ia Glen Innes. Ona ou manatu ai lea fetalaiga a le tatou fa’aola, ina o atu ia ma tala’i atu le tala lelei ma fai nu’u uma lava ma ou so’o, lea ua tatou fuifui fa’atasi ai i le Malaeola nei sei tulou tou paia ma tou sa.
Ae ile Tausaga 1976 Na ou Taunuu ai i NZ nei ma amata loa ona fai le tautua ma nofo tuavae i le Ekalesia. E Ala i Autalavou male aufaipese ale Ekalesia o Ponsonby. Ina vaitau sa to’a tele matafale ole Ekalesia ae pei tai ina ua tu’ua Ponsonby ae fa’atau o latou maota ma laoa i Otara, Otahuhu ma fafo atu o Ponsonby. Sa faapena loa ona faaititia matafale ole Ekalesia O se tasi o Tamalii ua leva ona nofoia le nofoa ole taitaifono le Afioga ia Patea Niupopo ma nisi otupu ma Tamalii ua fai i lagi le tuligasia seia o’o mai ile Tausaga 2006 Ma suia ai loa laau ole Faatoaga ma ou nofoia ai loa le nofoa ole taitai fono seia o’o mai ile taimi nei O le afioga ia Leilua Mika ole toe utaia lea ole Ekalesia Katoliko Samoa i Malaeola Aukilani NZ nei ma o ia fo’i lea ole pine faamau lena ole talaaga olo matou Ekalesia i Ponsonby.
O Ponsonby sa toa’tele lana autalavou sa Logologoa tala ole au volleyball alii ma tama’ita’i ile summer, ma lana au lakapi ile winter. Faapea foi ma lana aoga sa, sa to’atele alo ma fanau ale ekalesia. Peitai o le taimi nei ua leai se Autalavou leai se aoga Aso sa, ua leai ni tamaiti ona ua matutua fo’i tamaiti mafai aiga. Ua na’o o le Palisi e au i Sunday School ma le Parish Youth ae ua leai le itu i le Malaeola i lalo o le taitaiga a le matou faipese ma organist Sala Tuatagaloa Niko Tunai ma Lona alo o Tunaimatia Michael Tunai.
O le aofa’i o matafale o lo’o i ai nei e 12 on nisi o matafale ua au to va’a mo Ausetalia ma alala ai, a’o nisi ua fai aulotu ile Pitonuu olo’o alala ai ma nonofo ai.
Matou Taitai Pese: Le Afioga ia Patea Niupopo
O le Taitai Fono O Mafutaga Tama ma Tina: Le Afioga ia Leota Savelio
O le Sui Uso Fono o le Parish: Le Faletua ia Paneta Terei ma Fatima Tunai
Ole matou ofisa o le Ekalesia
Teu Tupe: Le Tofa ia Faifaimea Willie Collins
Failautusi: Le Faletua ia Fatima Tunai
Sui Taitai Fono: Le Tofa ia Tunaimatia Kapeli, Sala Kasio
Ma lo’u tagata olo’u faatautaia Lo matou sa Tevaga Mailo, Tuita’alili, Siamoa, Paulo, Tuala Fulu Petelo Lausului Le Lua
Soifua
